资深歌手夏韶声及太极乐队成员邓建明（Joey Tang）昨晚（13日）合体在九展开骚，但期间发生插曲，事缘到夏韶声再次出场时，Joey Tang走到台前想落台，但环境太黑他睇不清，踩空失去平衡，成个人打侧跌倒在地上，隔一阵才自己企起身，工作人员见状即紧张纷纷走上前，并扶他去后台休息。夏韶声就继续处变不惊在台上继续演出，唱出《狮子山下》。
唱完两首歌后，Joey Tang重返舞台，全场拍手欢呼，见他没甚大碍，但左手食指黐上胶布，他自嘲：“我得番3只手指用，我睇吓只手有冇断到。”之后又笑言：“头先挞咗落台，我少咗只手指，但郁得番冇事，迟啲会照一照。”
夏韶声外孙Kyle、歌手陈凯彤、陈欣健等人到场支持。一开始夏韶声以《天眼》掀开序幕，连唱8首歌。之后到Joey Tang出场，期间他在台上自爆早几日生日，叫全场唱生日歌给他。接着他唱出方皓玟《假使世界原来不像你预期》及MIRROR人气王姜涛的《孤独病》，送给身在澳洲读书、年半冇见的儿子。他又唱出自己作曲的《一加一减你》及《放弃我天地》送给太太，表示：“我同太太成日有拗撬，多谢佢让我。”发生“堕台意外”后，尾声两人行到台前多谢大家，Joey Tang即指住台边，示意夏韶声小心些。
骚后受访时见到Joey Tang只手敷住冰，他解释意外经过：“我嗰阵记错咗，以为台边仲有一级楼梯。（嗰阵好惊？）本能反应，都OK嘅，好彩唔系好高，我用脚试吓先，点知真系冇嗰级楼梯，但已经差唔多系时候，所以照落，点知就咁。（整亲边度？）结他落地、头落地，但结他同个头都冇事，但结他就夹到只手指，都想check吓只手有冇事。”夏韶声当时刚刚走出台前，故睇不到发生任何事，笑言：“如果知就跟埋一齐落，下半场唔使开。”问到之后可会照一照检查身体？Joey Tang表示：“头先只手指都郁到，同埋帮我训练体能嘅physician都喺度，佢帮我用冰敷，佢都系医生，好彩佢喺度。（太太好担心？）系呀，头先佢见到我冇事弹到都OK。”
问到可有影响之后演出？Joey Tang笑言：“我今次用3只手指弹，可能冇咁多手系好听啲，如果4只手指就好嘈。”夏韶声就表示第一晚开头未够好，但下半部愈来愈enjoy，讲到孙仔都来捧场，他笑言：“系呀，佢要睇多啲，将来可能系佢企上台，佢今日晏昼特登做好功课先嚟，听日都会嚟，可以玩晏啲。”而讲到Joey Tang谓年半冇见个仔，他坦言：“系呀，好彩佢喺嗰边识到啲新同学，佢读电影，初初要挨功课，后尾系最高分，佢依家习惯咗个人就开心，同埋听佢啲老师讲，先知道原来上年佢好迷失，惊自己做得唔好，老师就教佢写日记。”访问后Joey Tang见医生离场，跟他打招呼，并再喷镇痛剂，身旁穿黑衫的太太就似乎一脸担忧。
