现年33岁的无綫艺人蔡洁(Jacky)，近日再凭剧集《一舞倾城》演欢场头牌Monica大获好评，近年被网友选为“TVB最漂亮花旦”的她接受电台访问，坦言自细受父亲影响锺情港产片及广东歌，亦因偶像是张学友而改英文名Jacky。
蔡洁于2012年赴墨尔本修读硕士期间，参选当地华姐破纪录摘下7料冠军，但于翌年代表澳洲来港竞逐选国际中华小姐却三甲不入，她说：“最初到外国咩都想试，比赛心情好轻松，但嚟到香港好紧张，瘦到得40公斤根本唔靓。先有报章送我一个C1形容我‘华姐爱夜蒲’，其实我系同朋友饮嘢再放上网，点知畀人放大。新闻令我成个人绷紧晒，决赛当晚状态及表现都唔好，才艺表演弹琵琶，条线又松又全弹错，剩系识喺台上傻笑，冠军Gloria(邓佩仪)系实至名归，佢当晚表现好好。”
华姐一役后蔡洁回墨尔本修毕硕士课程，同年立即接拍电影出道，当中一幕大担情欲戏令人印象深刻外，更获提名金像奖最佳新演员。节目中，至于为何首部作品就肯为艺术而牺牲，她说：“我重申嗰场戏唔系全裸，只系大胆，亦绝唔系因为片酬而拍，片酬其实好低，甚至唔够来回澳洲费用。我喺澳洲毕业第二日先嚟香港拍戏，嗰时毕业未有方向，导演咁啱搵我，我觉得系上天畀我一个启示、有呢个机会要捉紧。可以入围金像奖，家人好安慰，到今日我都冇后悔拍咗。”
但之后4、5年，蔡洁签太阳娱乐拍了近20出电影尽是小角色，到转战电视圈上位前会否曾沮丧，她说：“我嘅世界唔会咁谂，我很佛系，一直有机会演戏，已经很幸运、感恩，好多人比我更有条件，亦未必有机会，我得到嘅已经比我评估自己嘅更多。迷惘一定有，只是迷惘自己可以点样做得更好，但从来无觉得唔开心、惨或浮浮沉沉！”
签约邵氏转战电视上位以来，她先后跟拍档黄宗泽及何浩文传过绯闻，她直指两段均属“流料”，被问及黄宗泽单身，二人曾否过电，她笑说：“佢单身你又知？哈！其实我都唔知！但Bosco系我好珍惜嘅朋友，我哋拍《飞虎之雷霆极战》已认识，虽然4、5年时间唔长，但佢系我喺呢个圈内好难得有交心嘅朋友，系好兄弟，甚至好姊妹！”再问Bosco被喻为“黄金笋盘”是否很吸引，她笑说：“哗！佢咁好条件，个个都畀佢吸引啦，我高攀唔起佢！我边有资格？佢都讲过高攀唔起我，我当然都要咁讲，我认为唔系所有感情都需要发展成情侣，好嘅友谊维持得更长，我都希望能跟Bosco发展成一世友谊。”
