艺人李施嬅（Selena）、关智斌（Kenny）和栢天男（Adam）等，（2日）出席电影《录影歹》开镜仪式。身兼电影监制及演员的Selena形容自己为“打杂”，她説：“剧本、翻译、搵演员就连伙食都系我做埋，我觉得大家做嘢咁辛苦都系为两餐，所以安排咗啲好嘢畀大家食，大家一定食得好！（咁多好嘢食唔怕食肥晒啲演员？）又唔系嘅，食得好大家士气都好啲，难得今次我做监制可以操控呢啲嘢，梗系食好啲，哈哈。”
回港已2个月的她坦言觉得时间过得有点混乱：“唔知发生咩事咁，头嗰半年病咗要医病，返到嚟又要筹备呢部电影。（有冇担心做监制压力大影响病情？）都有朋友担心嘅，因为今次剧本好多对白，我又要参与翻译，加上好多琐碎嘢要处理，但我反而觉得呢个工作令我开心番。（病好番晒？）好番晒但个样就有少少唔同嘅，番到去8成半啦，都算系咁啦2、3个月好番。”她表示因接受眼部手术，令眼皮上留有疤痕：“好阴功呀对眼劏咗2次，冇影响视力，但我要早啲瞓等啲疤早啲康服。”
问到作为监制感受，她直言非常佩服香港监制的工作能力：“外国一套戏会有十几个监制，每人都系负责一样嘢，但香港就可能得1、2个，乜都做晒，依家发现以前TVB啲监制真系好劲。”她又大赞电影中的两位男主角Kenny及Adam：“对佢哋嚟讲好大挑战，好多对白佢哋头都晕埋，尤其Adam啲中文麻麻哋，佢真系日日都练，练得好辛苦，好感激佢。”
艺人关智斌（Kenny）（2日）出席电影开镜仪式，Kenny指自己牙肉发炎好辛苦，他説：“讲嘢有啲辛苦，但食嘢先大镬，早几日食羽衣甘蓝好似食刀片咁，睇嚟我只系可以食雪糕。（财多身子弱？）我要更多财！亦都要身体健康，哈哈。”他指现时中港两地走拍电影：“拍完呢套月底左右返去。（隔离日数少咗方便两边走？）我主要都系睇边度搵我咪去边度，哈哈，如果唔使隔离我即刻攞3个月假去旅行，边度Open我就去。（泰国依家开放咗）泰国我睇咗新闻唔敢去呀！好惊呀惊畀人呃。（你好易呃？）我信冇咁大只蛤乸随街跳，我要问清问楚，试过有次收到电话话搞强积金，仲约我出去倾，我话好呀仲追问佢叫咩名，点知佢cut咗我线，哈哈。”
电影中他饰演一名表里不一的角色，而最大难度莫过于有大量对白：“今次系翻拍一套荷里活电影，呢套戏出名系好多好多对白，我有成200百纸对白，足足背咗三个礼拜，同埋之前我哋好似做舞台剧咁排过，因为套戏个时间性系一气呵成，有啲舞台剧嘅感觉，所以对白要记得好熟。”
